काठमाडौं– नेपाल राष्ट्र बैंकका नवनियुक्त गभर्नर डा. विश्वनाथ पौडेल र नेपाल स्टक एक्सचेन्जका प्रमुख कार्यकारी अधिकृत चुडामणि चापागाईँबीच भेटघाट भएको छ । 

भेटमा नेप्सेको पुनर्संरचनाको विषयमा छलफल भएको स्रोतले जानकारी दिएको छ । पौडेलले सीईओ चापागाईंसँग नेप्सेको पुनर्संरचनाको विषयमा के भइरहेको छ भनेर जिज्ञासा राखेको र चापागाँईले अर्थ मन्त्रालयमा बिचाराधीन रहेको ब्रिफिङ गरेको स्रोतले खबरहबसँग भन्यो । 

‘पुनर्संरचनाको विषय कति अगाडि बढ्यो ?’, स्रोतले खबरहबसँग गभर्नर पौडेलको भनाई उद्धृत गर्दै भन्यो । 

चापागाँईले अर्थ मन्त्री ज्यूसँग पुनर्संरचनाको विषय विचाराधीन रहेको पौडेललाई जानकारी गराएको स्रोतले बतायो । 

‘मन्त्री ज्यूकोमा विचाराधीन छ, यो पटक नीति तथा कार्यक्रममा पनि आएको छ, बजेटमा पनि आउँला, सरकारको कार्ययोजनामा पनि आउँला’, स्रोतले सिइओ चापागाईँको भनाई उद्धृत गर्दै भन्यो । 

राष्ट्र बैंक नेप्सेमा ९.५१ प्रतिशत शेयर स्वामित्व छ । पौडेल गभर्नर हुन अगावै नेप्सेको पुनर्संरचना गर्ने विषयमा सकारात्मक देखिएका थिए । गभर्नर भएर गएपछि पनि उनी नेप्सेको पुनर्संरचना गर्ने विषयमा सकारात्मक रहेको स्रोतको भनाई छ । 

भेटका क्रममा सिइओ चापागाँईले गभर्नर पौडेललाई बधाई दिएको नेप्सेले जानकारी दिएको छ । नेप्सेका प्रवक्ता मुराहरी पराजुलीले भने बधाई आदानप्रदान भएको जानकारी दिएका छन् ।

 ‘सिइओ ज्यूले बधाई दिनुभयो त्यही हो’, पराजुलीले भने, ‘त्यस्तो औपचारिक कुरा खासै केही भएन ।’

नीति तथा कार्यक्रम : फेरि पनि घोषणा भयो नेप्सेको पुनर्संरचना गरिने