काठमाडौं– भारतीयबारे विवादित बयान दिएपछि न्यूजिल्याण्डकी आप्रवासन मन्त्रीको आलोचना शुरु भएको छ । किवी आप्रवासनमन्त्री एरिका स्ट्यानफोर्डले संसदमा भारतीयहरुबारे विवादित बयान दिएकी थिइन् ।

त्यसबेला उनले कुनै पनि भारतीयले आफूलाई पठाउने इमेलको कहिल्यै पनि रिप्लाइ नदिने गरेको बताएकी थिइन् । उनले भनेकी थिइन्, ‘मैले आधिकारिक सूचना ऐनको पालना गरेकी छु । पछि काम लाग्छन् भन्ने उद्देश्यले मैले गर्नुपर्ने सबै कुराहरु संसदीय इमेल ठेगानामा फरवार्ड पनि गर्दै आएकी छु ।’

तर, भारतीयले पठाएको इमेलको जवाफ भने नदिने गरेको उनको भनाइ छ । उनले भनिन्, ‘मैले उदाहरणका लागि भारतका मान्छेबाट आप्रवासनसम्बन्धी सल्लाहबारे धेरै इमेलहरु पाउने गरेकी छु, म रिप्लाइ नै दिन्नँ । म यस्ता इमेललाई झण्डै स्पाम ठान्छु ।’

मन्त्रीको यस्तो भनाइ आएपछि लेबर पार्टीकी भारतीय मूलकी सांसद प्रियंका राधाकृष्णनले मन्त्री स्ट्यानफोर्डको आलोचना गरेकी छिन् । मन्त्रीको बयान ‘बेपरवाह’ र ‘भेदभावपूर्ण’ रहेको उनको भनाइ छ ।