काठमाडौं- काठमाडौं महानगरपालिकाको कार्यपालिका बैठक चार महिनादेखि बस्न सकेको छैन । गत पुस ८ गते पछिल्लो पटक बसेयता कार्यपालिका बैठक हुन नसकेको हो ।

काठमाडौं महानगरपालिकाकी उपप्रमुख सुनिता डंगोलले कार्यपालिका बैठक नबस्दा एजेन्डाको चाङ लागेको बताइन् । पछिल्लो समय मेयर बालेन्द्र साहसँग उपमेयर डंगोल, वडाध्यक्षहरू र प्रमुख प्रशासकीय अधिकृत सरोज गुरागाईंबीच मतभेद बढिरहेको छ । यसका कारण कार्यपालिका बस्न सकेको छैन ।

मेयर साहसँग उपमेयर, वडाध्यक्ष र प्रमुख प्रशासकीय अधिकृतको संवादहीन अवस्थाले हरेक महिना बस्नुपर्ने कार्यपालिका बैठक बस्न नसकेको हो । गत पुस ८ गतेयता काठमाडौंको कार्यपालिका बैठक बस्न सकेको छैन ।

‘चार महिनादेखि कार्यपालिका बैठक बस्न सकेको छैन, कसको कारण हामीले भनिरहनु परेन’, उनले भनिन्, ‘जुन दिन मेयरले महानगरपालिकामा मिटिङ बसौँ भन्नु हुन्छ, बस्छ । हामीले नहुने काम गर्नु हुँदैन ।’ उपमेयर डंगोलले मेयर साहसँगको सम्बन्धबारे अनेक अड्कलबाजी हुने गरेको बताइन् ।

‘सम्बन्ध हिजो जस्तो छ, आज पनि त्यस्तै छ’, उनले भनिन्, ‘अहिले प्रमुखलाई भेट्ने प्रयास गरिरहेको छु, भेटेपछि कुरा गर्छु ।’ उपमेयर डंगोल गत शनिबार बेल्जियमबाट फर्किएकी हुन् । त्यसयता उनी र मेयरबीच भेट हुन सकेको छैन । ‘एजेन्डा नभए शुभकामना दिन पनि कार्यपालिका बैठक बस्नुपर्छ’, उनले भनिन्, ‘अहिले त एजेन्डाको चाङ लागेको छ, अब त कार्यपालिका बस्नै पर्छ । म विदेशबाट गत शनिबार फर्केदेखि मेयरसँग भेट भएको छैन चार महिनादेखि बस्न सकेको छैन ।’ उनले जनताका धेरै प्रश्नको उत्तर कार्यपालिकाले दिनुपर्ने बताइन् ।

‘मैले जनतासँग भेटेर गुनासो सुनिनै रहेको छु’, उनले भनिन्, ‘ अनुगमन भइरहेको छ। अनुगमन तीव्र बनाउन काम गरेका छौँ , मलाई नै महानगरका धेरै कुरा जानकारी हुँदैन । मेयरसँग भेटेपछि धेरै कुरा हुनेछ ।’