काठमाडौं- जिल्ला समान्वय समिति (जिसस) काभ्रेपलान्चोकका प्रमुख दीपककुमार गौतम काठमाडौंबाट पक्राउ परेका छन् ।

गौतमलाई बैंकिङ कसुरको जाहेरी परेपछि बुधबार बिहान प्रहरी वृत्त नयाँ बानेश्वरको टोलीले नयाँ बानेश्वरबाटै पक्राउ गरेको हो ।

गौतम माधवकुमार नेपाल नेतृत्वको नेकपा (एकीकृत समाजवादी) बाट जिसस प्रमुखमा निर्वाचित भएका थिए ।

गौतमलाई बुधबार नै जिल्ला अदालत काठमाडौंबाट म्याद थप गरेर अनुसन्धान अगाडि बढाइने प्रहरीले जनाएको छ। उनलाई प्रहरी वृत्त बानेश्वरको हिरासतमा राखिएको छ ।

विभिन्न व्यक्तिसँग रकम लेनदेनका क्रममा दिएका चेक नसाटिएपछि उनीविरुद्ध जाहेरी परेको थियो। अहिले उनीविरुद्ध बैंकिङ कसुरसम्बन्धी मुद्दामा अनुसन्धान भइरहेको जिल्ला प्रहरी परिसर काठमाडौंका प्रवक्ता एसपी अपीलराज बोहोराले बताए ।