काठमाडौं– कालीमाटी तरकारी बजारमा बेच्न राखिएको पालुँगो सागमा अत्याधिक मात्रामा विषादी भेटिएको छ । 

बुधबार भक्तपुरबाट बिक्रीका लागि कालीमाटी बजारमा ल्याइएको पालुंगो सागमा ८३.६२५ प्रतिशत ‘अर्गानोफस्फेट’ नामक विषादी भेटिएको कालीमाटी फलफूल तथा तरकारी बजार विकास समितिले जनाएको छ ।

केन्द्रीय कृषि प्रयोगशालाले बुधबार कालीमाटी तरकारी बजारका १८ पसलको १८ थरी तरकारी तथा फलफूल परीक्षण गरेको थियो । परीक्षण क्रममा पालुंगो सागमा उक्त मात्रामा विषादी भेटिएको हो । 

सरकारको मापदण्ड अनुसार, यदि विषादीको मात्रा ३५ प्रतिशतभन्दा कम छ भने त्यसलाई उपभोग योग्य मानिन्छ । ३५ देखि ४५ प्रतिशतको विषादीको मात्रा भएमा केही दिन राखेर मात्र उपभोग गर्न सकिन्छ ।

४५ प्रतिशतभन्दा बढी विषादी भएको साग भने उपभोगका लागि अयोग्य मानिन्छ ।