काठमाडौं– नेपाली कांग्रेसका नेताहरूले पार्टीको कार्यकारी पदमा उम्मेदवारी दिनका निम्ति सम्पत्ति विवरण बुझाउन पर्ने विधानमा व्यवस्था हुनुपर्ने माग गरेका छन् ।

नेपाल विद्यार्थी संघ पूर्व केन्द्रीय समिति (२०६८–२०७३) ले आयोजना गरेको बृहत् भेटघाट तथा अन्तरक्रिया कार्यक्रमको घोषणा पत्र सार्वजनिक गर्दै नेताहरूले ४० वर्षभित्रका युवालाई ३० प्रतिशत प्रतिनिधित्व सुनिश्चितताको माग गरेका छन् । 

उनीहरूले युवासँगै विज्ञका निम्ति १० प्रतिशतसम्मको प्रतिनिधित्वको सुनिश्चित गराउन विधानमै व्यवस्था हुनुपर्ने माग गरेका हुन् ।

संविधान सभा सदस्य रञ्जित कर्णले नगरकोट घोषणापत्र सार्वजनिक गर्दै जुनसुकै तह र क्षेत्रमा उम्मेदवारी दिन कार्य योजना प्रस्तुत गर्ने बाध्यकारी व्यवस्था हुनुपर्ने बताए । कर्णले आरक्षणमा नदोहोरिने व्यवस्था मिलाउन पनि ध्यानाकर्षण गराए । 

अन्तरक्रियामा वडा तहदेखि संघीय सांसदसम्मको उम्मेदवारी प्रस्तुत गर्न कार्यकालको कार्ययोजना अनिवार्य हुनु पर्ने वैधानिक व्यवस्था गर्ने, समानुपातिक निर्वाचन प्रणाली हटाइ संसद् सङ्ख्या कम गर्ने र उम्मेदवारीमा समावेशीलाई पूर्ण रूपमा लागू गर्ने गरी व्यवस्था मिलाउन संविधान संशोधनमा पहल गर्ने निर्णय गरिएको कर्णले बताए ।

नेता कर्णका अनुसार नेपाली कांग्रेसको नीतिः उद्यमशीलता सहितको राजनीति अभियान सञ्चालन गर्ने निर्णय पनि भएको छ । कांग्रेसले राष्ट्रिय राजनीतिमा निर्णायक भूमिका निर्वाह गर्न सकेमात्र राष्ट्रिय समृद्धिको नेतृत्व लिन सक्ने छलफलको निष्कर्ष रहेको बताए ।