काठमाडौं– सूचना आयोगका प्रमुख आयुक्त सुरेश आचार्यले गलत नियत राखेर कसैले पनि सूचना माग्न नहुने र सूचना दिनेले पनि सूचना अपडेट भएर बस्नुपर्ने बताएका छन्  । 

आइतबार विराटनगरमा राष्ट्रिय सूचना आयोगले आयोजना गरेको प्रदेशस्तरीय सूचनाको हक सम्बन्धी अन्तरक्रियामा सम्बोधन गर्दै प्रमुख आयुक्त आचार्यले स्वच्छ र पारदर्शी रूपमा काम गर्नेहरूले डराउनु नपर्ने समेत बताए ।

उनले आयोगले अब अनावश्यक सूचना माग्नेसँग पनि छलफल गर्ने र उनीहरूलाई सतर्क गराउने तर्फ लाग्ने जानकारी दिए  । आचार्यले सुचना अधिकारीले आफ्नो दायित्व पुरा नगरे कारबाहीको भागी हुने उल्लेख गरे ।  

सो अन्तरक्रिया कार्यक्रमलाई सम्बोधन गर्दै कोशी प्रदेशका मुख्यमन्त्री हिक्मतकुमार कार्कीले सूचनाको हकको नाममा अत्यधिक खुल्ला छोड्दा सूचनाको दुरुपयोग गर्ने क्रम बढेको गुनासो गरे  ।

उनले सूचनाको हकलाई ठिक ढंगले सदुपयोग गर्नुपर्ने भन्दै संविधानले सूचनाको हक ग्यारेन्टी गरे पनि त्यसलाई सही ढंगले परिचालन गर्न तर्फ लाग्नुपर्ने जिकिर गरे  ।  

मुख्यमन्त्री कार्कीले सूचनाको हकले पारदर्शिता र जबाफदेहिता बढ्ने भएकाले यसतर्फ ध्यान दिँदै निश्चित व्यक्तिले मात्र नभई आम समुदायले यसलाई राम्ररी प्रयोग गरेर अघि बढ्नुपर्ने बताए  ।