काठमाडौं- पुराना दलहरू नेपाली कांग्रेस र नेकपा एमाले संसद् पुनर्स्थापनाका लागि मोर्चाबद्ध भइरहँदा काठमाडौं महानगरपालिकाका मेयर बालेन्द्र साह नयाँ शक्ति निर्माणको पहल तीव्र पारेका छन् ।

राष्ट्रिय स्वतन्त्र पार्टीका सभापति रवि लामिछानेसँग दुई दुई पटकसम्म भएको संवाद फलदायी हुन नसकेपछि बालेनले नयाँ उपाय खोजीका लागि छलफल थालेका हुन् ।

उनले बुधबार र बिहीबार स्वतन्त्र नागरिकदेखि राजावादी दलका नेताहरूसँग पनि वार्ता गरेका छन् । बालेनले वार्ता गरेकाहरूमध्ये राष्ट्रिय प्रजातन्त्र पार्टीका प्रवक्ता ज्ञानेन्द्र शाहीसमेत छन् ।

बालेनले आफ्ना सल्लाहकार कुमार बेनको घरमा बुधबार बेलुका ५ बजेदेखि ८ बजेसम्म शाहीसहितका नेताहरूसँग कुराकानी गरेका थिए ।

उक्त भेटमा युवा र नयाँ शक्तिहरू मिलेर जाने प्रस्ताव बालेनले राखेको खुलेको छ।

शाहीकाअनुसार फागुन २१ को चुनावअघि नै नयाँ दल र युवा शक्तिहरू मिलेर जानुपर्ने, एकजुट भएर जानुपर्ने प्रस्ताव गरेका थिए ।

‘बालेनजीले युवाशक्तिहरू एकजुट भएर जाऊँ भन्नुभयो’, भेटमा सहभागी एकजनाले खबरहबलाई भने, ’हिजो पनि सँगै हो, आज पनि सँगै मिलेर काम गरौँ भन्ने प्रस्ताव आएको छ। जहाँ भए नि एकजुट हुनुपर्‍यो भन्नु भयो ।’

भेटघाटबारे नेता शाहीले ‍औपचारिक धारणा दिएका छैनन् । स्रोतका अनुसार उक्त भेटमा मिलन पाण्डे, सागर ढकाल, डा. चन्द्रकान्त भण्डारी, ज्ञानेन्द्र शाही, रक्षा बम, डा. सीके राउत रेशम चौधरीलगायत सहभागी थिए ।