काठमाडाैं – शिक्षा, विज्ञान तथा प्रविधि मन्त्री महावीर पुनले प्राविधिक शिक्षा तथा व्यवसायिक तालिम परिषद् (सीटीईभीटी)लाई तत्काल कार्यान्वयन हुनेगरी चार निर्देशन दिएका छन्।

मन्त्री पुनले मौजुदा पाठ्यक्रमलाई सुधार गरी नवप्रवर्तन समावेश गर्ने खाका असोज मसान्तभित्र पेश गर्न निर्देशन दिएका छन्। साथै, एकीकृत शैक्षिक क्यालेन्डर तयार गरी परीक्षाको नतिजा तीन महिनाभित्र अनिवार्यरूपमा प्रकाशन गर्ने व्यवस्था मिलाउन आदेश दिएका छन्।

विद्यार्थी, अभिभावक र शिक्षकका गुनासो सुन्ने र त्यसको अभिलेखीकरण तथा समाधान गर्ने छुट्टै शाखा तुरुन्त गठन गरी सञ्चालनमा ल्याउनुपर्ने पनि मन्त्री पुनको भनाइ छ। यस्तै, २०६९ सालदेखि हालसम्म सम्बन्धनका लागि प्राप्त भएका सम्पूर्ण आवेदनको छानबिन गरी असोज मसान्तभित्र प्रतिवेदन पेश गर्न र सम्बन्धन दिने(नदिने निर्णय तत्काल गर्ने निर्देशनसमेत उनले दिएका छन्।

मन्त्री पुनले फेसबुकमार्फत् आफ्नो निर्देशन सार्वजनिक गर्दै ती कदम तुरुन्तै लागू गर्नुपर्ने बताएका छन्।