काठमाडौं– अर्थमन्त्री रामेश्वर खनालले पुँजीबजारमा आम लगानीकर्ताको मनोबल वृद्धिका लागि चाल्नुपर्ने प्रणालीगत तथा प्रक्रियागत सुधार सम्बन्धी अध्ययन गर्न गठन गरेको कार्यदलले प्रतिवेदन बुझाएको छ । 

मन्त्री खनालले पाँच दिनभित्र ठोस सुझाव र कार्ययोजना पेश गर्नुपर्ने गरी नेपाल धितोपत्र बोर्डका कामु कार्यकारी निर्देशक रूपेश केसीको नेतृत्वमा असोज ३ गते गठन गरेको कार्यदलले बिहीबार ३७ वटा सुझाव सहित आफ्नो प्रतिवेदन बुझाएको हो ।

कार्यदलले १५ वटा तत्काल सुधार गर्नुपर्ने, १५ मध्यकालमा गर्नुपर्ने सुधार र ७ वटा दीर्घकालमा गर्नुपर्ने सुधारको लागि सुझाव दिएको छ । 

कार्यदलले एकल ग्राहक सीमा २५ करोडलाई हटाउने, शेयर तथा ऋणपत्रमा एक वर्षभन्दा बढी अवधिको लागि मात्रै लगानी गर्न पाउने व्यवस्था खारेज, लगानीकर्ताले दुई वा सो भन्दा बढी हितग्राही खाता खोल्न सक्ने व्यवस्था गर्ने लगायत तत्काल कार्यान्वयन गर्नुपर्ने सुझाव दिएको छ ।

मध्यकालमा गर्नुपर्ने सुधारमा कार्यदलले नेप्सेको पुनर्संरचना गर्न आईपीओ जारी गर्ने, एसएमई प्लेटफर्म सञ्चालनमा ल्याउने, गैरआवासीय नेपालीबाट विदेशी मुद्रामा लगानी गरी नाफा लैजान सक्ने व्यवस्था गर्ने लगायतका सुझाव दिएको छ । 

त्यस्तै, कार्यदलले नेप्सेको दीर्घकालीन सुधार गर्न धितोपत्र बजार सञ्चलन र नियमनको लागि छुट्टाछुट्टै ऐन, नेप्सेमा रणनीतिक साझेदार, अन्तर्राष्ट्रिय मापदण्डअनुसारको कारोबार प्रणाली हुनुपर्ने सुझाव दिएको छ ।

कार्यदलले नेप्सेमा विभिन्न ८ वटा नीतिगत समस्या, १० वटा संस्थागत समस्या, ३ वटा प्रणालीगत समस्या, ५ वटा बजागरगत समस्या र अन्य कारणहरू रहेको औँल्याएको छ । लगानीकर्ता र सरोकारवालाबाट दर्जनौँ सुझाव लिएर सो प्रतिवेदन तयार गरेको कार्यदलले प्रतिवेदनमा उल्लेख गरेको छ ।