काठमाडौं– तत्कालीन केपी ओली नेतृत्वको एमाले–कांग्रेस सहितको गठबन्धन सरकारले चालु आर्थिक वर्ष (आव)को दुई महिनामा झण्डै ७० अर्ब सार्वजनिक ऋण थपेको थियो । 

सार्वजनिक ऋण व्यवस्थापन कार्यालयका अनुसार केपी ओली नेतृत्वको सरकारले चालु आवको साउन र भदौ महिनामा ६९ अर्ब ३२ करोड ३३ लाख रुपैयाँ राज्यको ऋण थप गरेको हो ।

कार्यालयका अनुसार चालु आवको साउन १ गतेसम्म नेपालको सार्वजनिक ऋण २६ खर्ब ७४ अर्ब ४ करोड ७७ लाख रुपैयाँ रहेकोमा भदौ मसान्तसम्म सो ऋण बढेर २७ खर्ब ४३ अर्ब ३७ करोड १० लाख रुपैयाँ पुगेको छ । जसमा आन्तरिक ऋण १२ खर्ब ६८ अर्ब २२ करोड ४१ लाख र बाह्य ऋण १४ खर्ब ५ अर्ब ८२ करोड ३५ लाख रुपैयाँ रहेको छ ।

सरकारले चालु आवमा ५ खर्ब ९५ अर्ब सार्वजनिक ऋण परिचालन गर्ने लक्ष्य राखेकोमा दुई महिनाको अवधिमा ७९ अर्ब १५ करोड प्राप्ति भएको सार्वजनिक ऋण व्यवस्थापन कार्यालयले जनाएको छ । चालु आवको दुई महिनाको अवधिमा सरकारले ६५ अर्ब ७ करोड ११ लाख रुपैयाँ ऋणको साँवा ब्याज भुक्तानीमा खर्च गरेको छ ।