काठमाडौं- नेपालका लागि इजरायलका राजदूत शामुलिक अरी बासले राप्रपा नेपालका अध्यक्ष कमल थापासँग सोमबार भेटवार्ता गरेका छन् ।

पूर्वउपप्रधानमन्त्री तथा पराराष्ट्रमन्त्री थापाले भेटका क्रममा वर्तमान अवस्थामा बदलिँदो भूराजनीतिक आयाम र यसले थपेका जटिलताले क्षेत्रीय शान्ति मूलतः मध्यपूर्वमा पनि असर पारेको बुझ्न सकिने बताए ।

राजदूतले राखेका सरोकारका विषयमाथि नेपाल सरकारको सरोकारवाला निकायसम्म पुर्‍याउने उनले बताए ।

क्षेत्रीय शान्तिका लागि एउटा जिम्मेवार राष्ट्रको रुपमा इजरायलले चालु युद्धको समाप्ति लगायत स्थायी शान्तिमा महत्वपूर्ण दायित्व निर्वाह गर्ने कुरामा थापाले विश्वास ब्यक्त गरे ।

इजरायलले नेपाली श्रमिकलाई रोजगारीको अवसर उपलव्ध गराएको, विद्यार्थीलाई तालिम र कृषिलगायतका अन्य क्षेत्रमा दिएको सहयोगका लागि थापाले धन्यवाद दिए ।

हमासको बन्धकका रुपमा रहेको विपीन जोशीको रिहाइका लागि आवश्यक पहल लगायत गाजामा देखिएको भोकमरीसहितका मानवीय संकट यथाशीघ्र समाधान गर्न उनले इजरायली पक्षसँग अनुरोध गरेका छन् ।

भेटका क्रममा राजदूतले हमासले इजरायलमाथि गरेको आक्रमणमा १० जना नेपाली विद्यार्थीको ज्यान गएको स्मरण गरे । उनले नेपाली युवा विपीन जोशीलाई बन्धक बनाएको विषयमा दुःख व्यक्त गरे ।

पार्टीका अन्तर्राष्ट्रिय सम्बन्ध विभागका सदस्य-सचिव राजाराम बर्तौलाका अनुसार ६७० दिनसम्म पनि विपीन लगायत बन्धकलाई छुटाउन नसकिएकोमा इजरायली राजदूतले दुःख व्यक्त गरे ।

हमासको बन्धकमा अझै ५० जनाभन्दा बढी रहेका छन् । जसमध्ये बीसजना जीवितै रहेको उनले बताए । विपीन जोशीका आमा र बहिनीलाई इजरायल लगेर बन्धक छुटाउन अन्तराष्ट्रिय दबाब दिइएको पनि उनले बताए ।

नेपाल र इजरायलबीचको कुटनीतिक सम्बन्धको चर्चा गर्दै उनले आपसी हितका कृषि, प्राविधिक, शैक्षिक, श्रमलगायत विविध क्षेत्रमा सहयोग गर्दै आएको स्मरण गरे ।

विपीनलाई हमासले बन्धक बनाएपछि नेपाल सरकारले ‘लर्न, अर्न एण्ड रिटर्न’कार्यक्रमअन्तर्गत अध्ययनका लागि इजरायल जाने विद्यार्थीलाई रोकेको भन्दै यो अवरोध हटाइदिन राजदूतले अनुरोध गरे ।