काठमाडौं– नेपाली कांग्रेसले जिल्ला कार्यसमितिहरूलाई भूमि समस्या समाधान आयोगले तोकेको ढाँचाबमोजिम निवेदन फारम पेश गर्नका लागि पार्टी मातहतका निकायहरूलाई यथाशीघ्र सूचित गर्न निर्देशन दिएको छ । 

कांग्रेसले सोमबार ७७ वटै जिल्लालाई परिपत्र गरेर आयोगको कामलाई प्राथमिकतामा राखेर थप प्रभावकारी बनाउनका लागि आवश्यक समन्वय गर्नसमेत भनेको छ । 

आयोगले भूमिहीन दलित तथा भूमिहीन सुकुम्बासीलाई जग्गा उपलब्ध गराउने र अव्यवस्थित बसोबासको व्यवस्थापन गर्ने प्रयोजनका लागि भूमिहीन दलित, भूमिहीन सुकुम्बासी र अव्यवस्थित बसोवासीले जग्गा प्राप्त गर्नका लागि आयोगले तोकेको ढाँचाबमोजिम ३५ दिनभित्र निवेदन फारम भर्न आग्रह गरेको छ । 

आयोगका अनुसार साउन ३० गतेबाट सुरू भएको निवेदन फारम भर्ने समयावधि असोज ३ सम्म रहेको छ । कांग्रेस–एमालेको संयुक्त सरकारले भूमिसम्बन्धी समस्या समाधानका लागि आयोग गठन गरेर कार्यसम्पादनको गति बढाउँदै लगेको छ ।