काठमाडौं – बागमती प्रदेश सरकारका मुख्यमन्त्री बहादुर सिंह लामा तामाङले कांग्रेसका चारजना मन्त्रीलाई पदमुक्त गरेका छन्।

संविधानको धारा १६८ (९)(ख)अनुसार मुख्यमन्त्री लामाले सोमबार उनीहरूलाई पदमुक्त गरिएको जानकारी दिएका हुन्। तर, उनले पदमुक्त गर्नुअघि नै मन्त्रीहरू सुरजचन्द्र लामिछाने, मदुकुमार श्रेष्ठ, मिनकृष्ण महर्जन र बिमल ठकुरीले राजीनामा दिइसकेका थिए ।

चार मन्त्रीले शुक्रबार बिहानै मुख्यमन्त्री समक्ष राजीनामा बुझाएका थिए। साथै, उनीहरूले नेपाली कांग्रेस संसदीय दलको नेता इन्द्रबहादुर बानियाँलाई समर्थन जनाउँदै मुख्यमन्त्री लामा विरुद्ध अविश्वास प्रस्ताव समेत दर्ता गराएका छन्।

बागमती प्रदेशसभामा ३७ सिट रहेको नेपाली कांग्रेसका २१ सांसदले अविश्वास प्रस्तावमा हस्ताक्षर गरेका छन्। प्रस्तावमा राजीनामा दिने चारै जना मन्त्रीको नाम पनि समावेश छ।

राजनीतिक रूपमा सक्रिय हुँदै गएको बागमती प्रदेशमा सत्ता समिकरण फेरिने संकेत देखिएको छ।