लुम्बिनी – उपप्रधानमन्त्री तथा अर्थमन्त्री विष्णु पौडेलले रूपन्देहीमा विभिन्न चालु र नयाँ योजनाको आज स्थलगत अवलोकन गरेका छन् । अर्थमन्त्री पौडेल आज साँझ रूपन्देहीको तिलोत्तमा नगरपालिका–६ मा चालु र नयाँ योजनाको स्थलगत अवलोकनमा गरेका छन्।

उनले तिलोत्तमा–६ मा रहेको नौकट्टी सडकको अवलोकन गर्नुका साथै वडा नम्बर ६ गोरकट्टास्थित निर्माणाधीन अवस्थामा रहेको १५ शैय्याको नगर अस्पतालको अवलोकन गरे । उक्त स्वास्थ्य चौकीलाई नगर अस्पतालको रूपमा स्तरोन्नति गर्न लागिएको हो ।

अस्पताल पूर्ण निर्माण भई सञ्चालनमा ल्याउन रु १७ करोड लागत अनुमान गरिएको छ । चौध कठ्ठा क्षेत्रफलमा फैलिने अस्पताल स्थापनाको लागि स्व. गोपाल ओझान्ठाक्ष, अमृतप्रसाद ओझान्ठाक्ष र शम्भुप्रसाद ओझान्ठाक्षले जग्गा उपलब्ध गराएका थिए ।

सो क्रममा स्थानीय २०८४ अघि नै अस्पताल निर्माणको काम सम्पन्न गर्न अर्थमन्त्री समक्ष आग्रह गरे । अर्थमन्त्रीका साथमा सहभागी तिलोत्तमा नगरपालिकाकी उपप्रमुख जगेश्वरदेवी चौधरी र तिलोत्तमा–६ का वडाध्यक्ष गणेश पाठकले यो अस्पताल सिङ्गो नगरको गौरवको विषय भएकाले यसलाई सकेसम्म छिटो पूरा गर्न ध्यानाकर्षण गराए ।

अर्थमन्त्री पौडेलले अस्पताल निर्माण सम्पन्न गर्न सरकारले यथाशक्य सहयोग गर्ने भन्दै निर्माणको कामलाई गति दिन आग्रह गरे । उनले पश्चिम पहुनी मावि, मोक्षधामको अवलोकन गर्नुका साथै वस्तुस्थितिबारे जानकारी लिए ।

त्यस्तै उनले कुन्जलापुरमा रहेका दुई वटा पुलको निरीक्षण गर्नुका साथै कुन्जलापुरदेखि नगर अस्पतालसम्म जाने रु तीन करोड लागतको सडक र गोरकट्टादेखि गणेशपुर जाने रु तीन करोड लागतको कुलोको अवलोकन गरी वस्तुस्थितिबारे जानकारी लिए ।