काठमाडौं– ताइवानकी उपराष्ट्रपति साइओ बि खिमले राष्ट्रिय सुरक्षा र क्षेत्रीय स्थीरताप्रति आफ्नो सरकार प्रतिबद्ध रहेको बताएकी छिन् । ताइवानलाई लक्षित गर्दै चिनियाँ सैन्य गतिविधि बढिरहेका बेला उपराष्ट्रपतिले यस्तो बताएकी हुन् ।

विदेशी सञ्चारमाध्यम तथा प्रतिनिधिसँगको संवादका क्रममा उनले अत्यन्त अस्थीर र संवेदनशील क्षेत्रमा अवस्थित ताइवानले आवश्यक सन्तुलन कायम राख्दै अघि बढिरहेको उल्लेख गरिन् । उनले चिनियाँ गतिविधिलाई ‘आक्रामक सैन्य व्यवहार’ को संज्ञा समेत दिइन् ।

ताइपेई टाइम्सका अनुसार उनले चीनले घुसपैठ र ताइवानी समाजमा विभाजन ल्याउने प्रयास गरिरहेको आरोप समेत लगाइन् । चीनको यस्तो कदमबाट क्षेत्रीय यथास्थितिमा प्रत्यक्ष रुपमा नकारात्मक असर पार्ने उनको भनाइ छ ।

उनले चिनियाँ गतिविधिको जवाफ दिन ताइवानले विभिन्न कदमहरु पनि चालिरहेको जानकारी दिइन् । उनका अनुसार हाल ताइवानले राष्ट्रिय प्रतिरक्षा रणनीतिमा सुधारको प्रयास गरिरहेको छ भने सैन्य आधुनिकीकरणमा जोड दिइरहेको छ ।