काठमाडौँ – पूर्वराष्ट्रपति विद्यादेवी भण्डारीको पक्षमा प्रवक्ता बनेर नहिँड्न अध्यक्ष केपी शर्मा ओलीले दिएको निर्देशनविपरीत नेकपा (एमाले) का नेतासमेत पत्रकार सम्मेलनमा सहभागी भएका छन् ।

बबरमहलस्थित कार्की ब्यांकेटमा शुक्रबार भण्डारीले आयोजना गरेको पत्रकार सम्मेलनमा एमाले नेता विनोद ढकालसमेत सहभागी भएका हुन् ।

पूर्वराष्ट्रपति भण्डारीले एमाले केन्द्रीय कमिटीको निर्णयविरुद्ध आफ्ना धारणा सार्वजनिक गर्न पत्रकार सम्मेलन आयोजना गरेकी हुन् । उक्त कार्यक्रममा पार्टी अध्यक्ष ओलीको निर्देशनलाई चुनौती दिँदै एमाले मोरङका चर्चित नेता ढकाल सहभागी बन्न पुगेका छन् ।

एमालेमा केपी ओली इतर गुट खडा गर्न नेता ढकालले भूमिका खेलिरहेका छन्‌ । कोशी प्रदेश कमिटीको अध्यक्षमा हराइएका उनले एमाले मोरङको दसौँ अधिवेशनमा ओली गुटलाई हराउँदै आफ्नो प्यानल नै जिताएका थिए ।

त्यसपछि उनी पू्र्वराष्ट्रपति भण्डारीको समूहमा खुलेका थिए । पूर्वराष्ट्रपति भण्डारी कोशीमा जाँदा पनि उनैले स्वागत र सत्कार गर्ने गरेका छन्‌ ।

पत्रकार सम्मेलनमा उनी बाहेक एमालेका अन्य शीर्ष नेता भने देखिएका छैनन् ।