काठमाडौं- देशका विभिन्न स्थानमा आगलागी हुँदा धनमाल जलेर नष्ट भएको छ ।

सुनसरीको वराहक्षेत्र नगरपालिका-२ पुनरबासका सुभाष राईको गोठमा बिहीबार राति आगलागी हुँदा करिब ९ लाख रूपैयाँ बराबरको धनमाल जलेर नष्ट भएको प्रहरीले जनाएको छ ।

यस्तै सुनसरीकै दुहबी-३ स्थित अमित जैशवालले सञ्चालन गरेको दिपक सस्केप (कवाडी) गोदाममा बिहीबार दिउँसो आगलागी हुँदा करिब ६ लाख रूपैयाँ बराबरको धनमाल जलेर नष्ट भएको बताइएको छ ।

सिराहाको धनगढीमाई-३ हनुमाननगरका कुजीलाल धरीको गोठमा बिहीबार राति आगलागी हुँदा करिब २ लाख ५० हजार रूपैयाँ बराबरको धनमाल जलेको प्रहरीले बताएको छ ।

भोजपुर षडानन्द नगरपालिका-१ आमबोटेका कृष्ण सुनामको घरमा बिहीबार दिउँसो आगलागी हुँदा करिब ६ लाख रूपैयाँ बराबरको धनमाल जलेर नष्ट भएको छ ।

स्थानीय बासिन्दा तथा दमकलको सहयोगमा आगलागी नियन्त्रणमा लिएको प्रहरीको भनाइ छ ।