काठमाडौं – गत जनवरीमा तेलगु फिल्म ‘गेम चेन्जर’ प्रदर्शनमा आएको थियो । यो फिल्मको लगानी ४०० करोड बताइएको थियो ।

यस फिल्ममा राम चरण र बलिउड नायिका कियारा अडवाणी शीर्ष भूमिकामा थिए । यो फिल्मले बक्स अफिसमा डिजास्टर साबित भयो ।

यो फिल्मको लाइफटाइम ग्रस कलेक्सन १६० करोड हाराहारी मात्रै छ ।

यो फिल्म असफलतबारे निर्माता दिल राजुले मिडियामा खुलेर बोलेका छन् । द टाइम्स अफ इन्डियासँगको कुराकानीमा उनले रोचक कुरा पनि सेयर गरेका छन् ।

सुरुमै उनले फिल्मको व्यापार डिजास्टर भएको स्वीकार गरेका छन् ।

यो फिल्म सम्पादनको क्रममा तनाव भएको उनको भनाइ छ । उनले भने, ‘यो फिल्म फुटेज ७ घण्टाको निस्कियो । जसलाई तीन घण्टामा झार्नु थियो । निर्देशक एस शंकर भिडियो सम्पादकमाथि हाबी बन्दा झन् समस्या भयो ।’

अर्थात्, उनी निर्देशकको काम प्रति असन्तुष्ट देखिएका छन् । अनावश्यक फुटेज खिच्दा बढी खर्च निस्किएको उनको आशय छ ।

थप दर्शकलाई हलमा तान्न फिल्मको ग्रस कलेक्स बढाएर झुटो प्रचारसमेत भएको उनले स्वीकार गरेका छन् । यसलाई उनले आफूहरुको कमजोरी मान्छन् ।

उनले भने, ‘फिल्मको पहिलो दिनको व्यापार १०० करोडले बढाइएको थियो ।’

निर्धारित समयभन्दा ढिला फिल्म तयार भएकाले समेत केही घाटा थप व्यहोर्नु परेको राजुले बताए ।

उनले भने, ‘कलाकारहरु सेयरमा थिए । निर्माण ढिला भएपछि उनीहरुले निश्चित पारिश्रमिक मागे । यसले झन् घाटाको रकम बढ्यो ।’

यो फिल्मबाट आफूले दुई कुरा मुख्य रुपमा सिकेको राजुले बताए । उनले भने, ‘स्टार कलाकार र खर्चिलो निर्देशक मात्र भए पुग्दैन रहेछ । कथा नै बलियो हुनुपर्ने रहेछ ।’