काठमाडौं– भारत विश्वको चौथो ठूलो अर्थतन्त्र बन्न सफल भएको छ । जापानलाई पछि पार्दै भारत विश्वको चौथो ठूलो अर्थतन्त्र बन्न सफल भएको हो ।

भारतको नीति आयोगका प्रमुख कार्यकारी अधिकृत (सीईओ) बीभीआर सुब्रमण्यमले यसबारे जानकारी दिएका हुन् । नीति आयोगको गभर्निङ काउन्सिलको १० औं बैठकपछि उनले अन्तर्राष्ट्रिय मुद्रा कोषको तथ्यांक उद्धृत गर्दै भारतीय अर्थतन्त्रको आकार ४ ट्रिलियन डलर पुगेको समेत जानकारी दिएका छन् ।

अब भारतभन्दा अघि अमेरिका, चीन र जर्मनीमात्र रहेका छन् । उनले योजनाअनुसार अर्थतन्त्र सञ्चालन भएमा अबको दुई तीन वर्षमा भारतले जर्मनीलाई पनि पछि पार्ने जिकिर गरे ।

हाल भारतीय अर्थतन्त्र तीव्र गतिमा वृद्धि भइरहेको छ । यस आर्थिक वर्षको चौथो त्रैमासमा भारतको वृद्धिदर ६.८ प्रतिशत पुग्ने अनुमान गरिएको छ । यसअनुसार आर्थिक वर्ष २०२५ को समग्र वृद्धिदर ६.३ प्रतिशत रहनेछ ।