काठमाडौं- प्रधानमन्त्री केपी ओलीले राजावादीका नाममा लुटपाट गर्न भाडाका मान्छे काठमाडौंमा उतार्ने गरिएको बताएका छन् ।

नेकपा एमाले बागमती प्रदेश कमिटीले आइतबार गरेको बागमती प्रदेशमा नेकपा एमालेबाट निर्वाचित वडाध्यक्षहरूको भेलालाई आइतबार ललितपुरमा सम्बोधन गर्दै उनले यस्तो भनेका हुन् ।

उनले पूर्वराजा ज्ञानेन्द्र शाहलाई पनि अनावश्यक भ्रामक कुरा गरेर जनतालाई उल्लु बनाउने प्रयास नगर्न आग्रह गरे । आफ्नो पालामा के भएको थियो र बहुदल आएपछि के भएको छ भनेर आफैँ तुलना गरेर हेर्न उनले पूर्वराजालाई चुनौती दिए ।

ओलीले राजतन्त्र कस्तो हो भन्ने कुरा नयाँ पुस्तालाई थाहा नभएको बताए ।‘राजतन्त्र के हो ? कस्तो थियो ? के गरेको थियो ? भन्ने कुरा नयाँ पुस्तालाई बुझाउनु पर्छ’, उनले भने ।

राजावादीको नामामा भाडा तिरेर लुट्न ल्याएका मानिसहरू काठमाडौंमा उफ्रिने गरेको ओलीले बताएका छन् ।

देशमा भाँडभैलो मच्चाउन राजावादीहरूको दक्षिणपन्थी गिरोह, प्रचण्ड नेतृत्वका स्वघोषित कम्युनिष्ट पार्टी माओवादी र सामाजिक अराजकतावादी शक्ति सक्रिय रहेका उनले बताए । त्यसैलाई रोक्न एमाले र कांग्रेस मिलेरका ओलीले स्पष्ट पारे ।