काठमाडौं– बङ्गलादेशी नागरिकलाई नेपाल हुँदै वैदेशिक रोजगारीका लागि विभिन्न देश पठाइदिन्छु भन्दै रकम ठगी गर्ने गिरोहलाई प्रहरीले नियन्त्रणमा लिई सार्वजनिक गरेको छ ।

ठगीमा संलग्न रहेको अभियोगमा पाँच जना बङ्गलादेशी नागरिकलाई पक्राउ गरी शुक्रबार सार्वजनिक गरिएको हो ।

प्रहरीका अनुसार ठगहरूले नेपाल हुँदै वैदेशिक रोजगारीका लागि अष्ट्रेलिया, इटाली, स्पेन, फ्रान्स, सर्भिया, अल्बानियालगायत मुलुकमा पठाउन सहज हुने भनी एजेन्टमार्फत पर्यटक भिसामा बङ्गलादेशी नागरिकलाई नेपाल बोलाएका थिए ।

प्रतिव्यक्ति ३ हजार ५ सय अमेरिकन डलरको दरले १३ जना पीडितबाट ४५ हजार पाँच सय अमेरिकन डलर लिई ठगहरू सम्पर्कविहीन भएका थिए । उनीहरूलाई उजुरीका आधारमा पक्राउ गरिएको प्रहरीले जनाएको छ ।
पक्राउ परेकाहरूका साथबाट राहदानी १९ थान, मोबाइल चार थान, अमेरिकन डलर नौ हजार ८ सय ५०, बङ्गाली टाका ३९ हजार ९०५ र नेपाली २५ हजार रपैयाँसमेत प्रहरीले बरामद गरेको छ ।

उनीहरूलाई काठमाडौँ महानगरपालिका–९ सिनामङ्गलस्थित शिवसताक्षी गेष्ट हाउसबाट काठमाडौँ उपत्यका अपराध अनुसन्धान कार्यालयको टोलीले पक्राउ गरेको केन्द्रीय प्रहरी प्रवक्ता तथा प्रहरी नायब महानिरीक्षक दिनेशकुमार आचार्यले जानकारी दिए ।

पक्राउ पर्नेहरूमा काठमाडौँ–९ कालिमाटी बस्ने बङ्गलादेशको चट्टोग्राम मोबारक गोना घर भएका ५० वर्षीय मोहम्मद मुस्तफिजुर रहमान, चाँदपुर तोरागर हाजिगञ्ज घर भएका ४१ वर्षीय मुहम्मद फरहाद हुसेन चौधरी र चाँदपुर हाजीगाउँ बाराकोल घर भएका ४६ वर्षीय अबु युसुफ एमडी हानिफ छन् । यस्तै काठमाडौँ–८ गौशाला बस्ने मागुरा मागुरासदर थाना बेरोइलग्राम घर भएका ४७ वर्षीय मिल्टन भनिने काजी शाहतब हुसेन र बागिरथ सदर थाना कान्दापरा घर भएका ४० वर्षीय अजिम मोलिकलाई पक्राउ गरी सार्वजनिक गरिएको हो ।