काठमाडौं– नेपाली कांग्रेसको केन्द्रीय शिक्षा विभाग प्रमुख नैनसिंह महरले शिक्षकका माग सम्बोधनका लागि सरकार, संसद् र सरकार सञ्चालनमा सहयोग गर्न बनेको उच्चस्तरीय संयन्त्रलाई जिम्मेवार बन्न आग्रह गरेका छन् । 

उनले शुक्रबार विज्ञप्ति जारी गर्दै शिक्षकहरूका जायज माग सम्बोधन गरी शैक्षिक क्षेत्रमा देखिएको समस्या समाधान गर्न संसद्, सरकार र सरकार सञ्चालनमा सहयोग गर्न बनेको उच्चस्तरीय संयन्त्रलाई गम्भीर बन्न आग्रह गरेका हुन् । 

‘आजबाट सुरु भएको संसद् अधिवेशनले शिक्षक आन्दोलनको निकास दिने गरी शीघ्रतिशीघ्र विद्यालय शिक्षा विधेयक पारित गर्न पुनः माग गर्दछु,’ कांग्रेस केन्द्रीय सदस्य महरले भनेका छन् । 

संविधान जारी हुँदा संविधानको पूर्ण कार्यान्वयनका लागि आवश्यक कानुन तीन वर्षभित्र निर्माण गरिसक्नुपर्ने व्यवस्था गरिएको स्मरण गर्दै उनले संविधान जारी भएको १० वर्ष भइसक्दा पनि संसद्को गैर जिम्मेवारीले झण्डै तीन सय कानुन बन्न नसकेको अवस्था रहेको बताएका छन् । 

‘जसका कारण कानुनी राज्यको अवधारणाको समेत खिल्ली उडाएको छ । संघीय सरकार, संसद् र सांसदहरूले कानुन निर्माण गर्ने आफ्नो पदीय दायित्व र जिम्मेवारी बोध नगरी व्यक्तिगत र पार्टीगत स्वार्थमा रुमलिँदा कानुन निर्माणले गति नलिएको तथ्य हाम्रो सामु छ,’ महरले भनेका छन् ।