काठमाडौं- अदालतबाट प्रमाणित दोषीहरूलाई भिसा दिएको भन्दै त्रिभुवन विश्वविद्यालयका उपप्राध्यापक प्रेम चलाउनेले अमेरिकी र अष्ट्रेलियन दूतावासलाई पत्र लेखेका छन् ।

चलाउनेले लेखेको पत्रमा हरिप्रसाद आचार्यलाई सन् २०२३ मा कीर्ते दस्तावेजको आधारमा भिजा दिइएको भन्दै राजदूत डीनआर थोमसनलाई पत्र लेखेका छन् ।

पत्रमा चलाउनेले सन २०२० अक्टोबर ६ मा आफूलाई मरणासन्न हनेगरि कुटपिट गरिएको खुलाएका छन् । आफूले राजनीतिक रुपमा संरक्षित गरिएका उनीहरूविरुद्ध आफूले विभिन्न माध्यमबाट हारगुहार गरिरहेको बताएका छन् ।

अमेरिकालाई प्रजातन्त्र, कानुनी शासन र मानव अधिकारको देश भन्दै न्यायको पक्षमा अपिल गर्नुपरेको चलाउनेले लेखेका छन् ।

अंग्रेजी भाषाको पत्रमा चलाउनेले भनेका छन्, ‘कुनै एक ठाउँमा अन्याय सबै ठाउँको अन्याय हो ।’

आचार्यकै जोडबल र आडमा आफूलाई सात जनाले रड र भाटाले कुटपिट गरेको त्यही समूहले त्रिभुवन विश्वविद्यालयमा ३४२ दिन ताला लगाएको चलाउनेले उल्लेख गरेका छन् ।

पत्रमा अदालतको फैसलाबाट दोषी करार आचार्यको तस्बिर पनि समेटेर पठाइएको छ । आचार्यविरुद्ध गम्भीर अपराधको मुद्दा चलिरहेको अवस्थामा भिसा दिइइको भन्दै चलाउनेले राजदूत थोमसनको ध्यानाकर्षण गराएका छन् ।

उनैले अस्ट्रेलिया पुगेका अर्का दोषीलाई दिइएको भिसाको कुरा लिएर राजदूत लिन जोन्स्टोनलाई पनि पत्र लेखेका छन् ।

सन् २०२४ डिसेम्बरमा लेखिएको पत्रमा निरज रानामगर अस्ट्रेलिया भागेको कुरालाई लिएर चलाउनेले ध्यानाकर्षण गराएका छन् ।

ज्यानै लिने नियतले आक्रमण गरिएको घटनामा संलग्न भनिएका मगर पनि सन २०२३ मै अस्ट्रेलिया पुगेको भन्दै उनले ध्यानाकर्षण गराएका छन् ।