काठमाडौं- केपी ओली कपअन्तर्गत मंगलबार भएको खेलमा मैदानमै खेलाडीबीच घम्साघम्सी भएको छ ।

सातदोबाटोस्थित एन्फा कम्प्लेक्समा विभागीय एपीएफ र संकट क्लबबीचको खेलमा खेलाडीहरूले रेफ्रीसँग विवादमा उत्रिँदै हातपातको कोसिसमेत गरेका छन् ।

रेफ्रीले रातो कार्ड देखाएपछि संकटा फुटबल क्लबका विदेशी खेलाडीहरू विवादमा उत्रिएका थिए ।

एपीएफका एलिक श्रेष्ठलाई संकटाका ओवोसु बोटेङले मैदानमै हात हालेपछि रेफ्री ज्ञानबहादुर तामाङले सिधै रातो कार्ड देखाए ।  त्ययसक्रममा संकटाका अन्य विदेशी खेलाडी पनि रेफ्रीलाई हातपात गर्न उत्रिएका थिए ।

त्यसक्रममा संकटाका कप्तान दीप कार्की लगायतले विदेशी खेलाडीलाई रेफ्रीलाई हातपात गर्न नदिन छुट्याए ।

विवादबीच भएको खेलमा संकटा क्लब सेमिफाइनलमा पुगेको छ । संकटाले टाइब्रेकरमा एपीएफलाई ५–३ ले हराउँदै सेमिफाइनलमा पुगेको हो ।

निर्धारित समयमा दुवैतर्फबाट गोल नभएपछि खेल टाइब्रेकरमा धकेलिएको थियो । एपीएफका सुजन पुलामीको प्रहारलाई संकटाका गोलरक्षक दीप कार्कीले असफल पार्दै टोलीलाई जिताएका हुन् ।

फाइनल प्रवेशका लागि संकटाले त्रिभुवन आर्मी क्लबसँग प्रतिस्पर्धा गर्नेछ । केपी ओली कपअन्तर्गत मंगलबार दोस्रो खेल मछिन्द्र एफसी र एफसी ट्रान्सपोर्ट युनाइटेडबीच हुँदैछ ।

तस्बिरहरू : नेपाल फोटो लाइब्रेरी