वाशिंटन – अमेरिका भ्रमणमा रहेका फ्रान्सेली राष्ट्रपति एमानुएल म्याक्रोनले शान्ति स्थापनाको अर्थ युक्रेनको आत्म समर्पण मात्र हुन नहुने बताएका छन्।

रुसले युक्रेनमा आक्रमण गरेको तीन वर्षपछि सोही युद्ध अन्त्यका लागि दुवै नेताबीच छलफल भएको छ।

अमेरिकी राष्ट्रपति डोनाल्ड ट्रम्पले शान्ति स्थापनाका लागि अमेरिकाले मात्र नभई युरोपेली राष्ट्रले पनि मूल्य चुकाउनु पर्ने बताए। यसअघि किभमा भएको पश्चिमा देशको सम्मेलनमा युक्रेनी राष्ट्रपति भालाडोमिर जेलेन्सकीले यसै वर्ष युद्ध अन्त्यको अपेक्षा राखेको बताए।

२४ फेब्रुअरी २०२२ मा रुसले युक्रेनमा आक्रमण सुरु गरेको थियो। अहिलेको वार्तामा प्रतिबद्धता पुरा गर्ने सवालमा रुसको खराब विगतका बारे पनि छलफल भएको थियो। फ्रान्सेली राष्ट्रपति म्याक्रोनले पुटिनले शान्ति स्थापनाका लागि संसारलाई विश्वस्त पार्नुपर्ने बताए।

वार्तापछि भएको पत्रकार सम्मेलनमा ट्रम्पले म्याक्रोनको प्रशंसा गर्दै थुप्रै सकारात्मक पहल भएको बताए। उनले अमेरिका युक्रेन बीचका खनिजका लागि भएको डिललाई निष्कर्षमा लैजानका लागि युरोपेली देशले पनि सहयोग गर्नुपर्ने बताए।