काठमाडौं– भारतले अफगानिस्तानका जनताको प्रतिनिधित्व गर्ने सरकारसँग सहकार्य गर्न तयार रहेको जनाएको छ ।

भारतीय विदेश मन्त्रालयले ‘अफगानिस्तानका जनताको सरकारसँग’ विकास साझेदारी र मानवीय सहायताजस्ता क्षेत्रमा सहकार्य गर्न तयार रहेको जनाएको छ ।

भारतीय समाचार संस्था एएनआईका अनुसार हालै भारतीय विदेश सचिव विक्रम मिस्रीले अफगानिस्तानका कार्यवाहक विदेशमन्त्री मौलवी आमिर खान मुत्तकीसँग भेटवार्ता गरेका छन्। यसलाई भारतले अफगानिस्तानमा शासन चलाइरहेको तालिबानसँग सम्बन्ध विस्तार गर्न खोजेको रुपमा अथ्र्याइएको छ ।

भारतीय विदेश मन्त्रालयका प्रवक्ता रणधीर जयसवालले दुई मुलुकका प्रतिनिधिबीच दुबईमा भेटवार्ता भएको जानकारी दिएका छन् । उनले यसलाई दुई मुलुकबीच भएको सबैभन्दा उच्च स्तरको भेटवार्ताको संज्ञा दिएका छन् ।

सन् २०२१ मा तालिबानले अफगानिस्तानको शासन आफ्नो पकडमा लिएको थियो । त्यसयता तालिबानले उल्लेख्य कूटनीतिक सम्बन्ध विस्तार गर्न सकेको छैन ।