काठमाडौं– अमेरिकाको मिसिगन विश्वविद्यालयले चीनको एउटा विश्वविद्यालयसँग प्राज्ञिक साझेदारी रद्द गरेको छ ।

राष्ट्रिय सुरक्षाको कारण देखाउँदै मिसिगन विश्वविद्यालयले चीनको सांघाइमा रहेको सांघाइ जियाओ टोङ विश्वविद्यालयसँग प्राज्ञिक साझेदारी रद्द गरेको हो ।

केही महिनाअघि चिनियाँ विश्वविद्यालयबाट आएका ५ जना विद्यार्थी अमेरिकी सैन्य आधार क्षेत्र नजिकै शङ्कास्पद अवस्थामा फेला परेका थिए । उनीहरु अमेरिकी सेनाकोक्याम्प ग्रेलिङमा सैन्य प्रशिक्षण भइरहेका बेला शङ्कास्पद अवस्थामा फेला परेका थिए ।

मिसिगन विश्वविद्यालयका अध्यक्ष सान्टा ओनोले पत्र लेख्दै निकै लामो समयको सूक्ष्म अध्ययनपछि चिनियाँ विश्वविद्यालयसँग सहकार्य तोडिएको जनाएका छन् ।

पत्रमा आफ्नो विश्वविद्यालयले अन्तर्राष्ट्रिय प्राज्ञिक साझेदारलाई महत्व दिएको भए पनि राष्ट्रिय सुरक्षाको विषय निकै गम्भीर भएको ओनोले जनाएका छन् ।

पछिल्लो समय अमेरिकाका कतिपय विश्वविद्यालयले चिनियाँ विश्वविद्यालयसँगको प्राज्ञिक सम्बन्ध तोड्न थालेका छन् । केही समयअघि जर्जिया टेक र युनिभर्सिटी अफ क्यालिफोर्निया बेर्केलीले यस्तै सहकार्य तोडेका थिए ।