काठमाडौं– धनकुटाको साँगुरीगढी गाउँपालिका–६ स्थित भेडेटारमा पुस १६ देखि १८ गतेसम्म खाना महोत्सव आयोजना हुने भएको छ ।  

होटल एसोसिएसन भेडेटारले बुधबार भेडेटारमा पत्रकार सम्मेलन गर्दै १३ औ खाना महोत्सव अर्थात् फुड फेस्टिभल पुस १६ देखि १८ गतेसम्म आयोजना गर्न लागिएको जनाएको हो । 

अग्रेजी नयाँ वर्ष २०२६ को अवसरमा हुन लागेको महोत्सवमा विभिन्न जातीय तथा अर्ग्यानिक खानाका परिकार राखिने आयोजकले जनाएको छ । 

त्यस्तै खाद्यान्न, नगदे र औद्योगिक बाली ,फलफूल, तरकारी, आलु बाली तथा स्थानीय कृषि उत्पादनका स्टल राखिने जनाइएको छ । 

आन्तरिक तथा बाह्य पर्यटकलाई मध्यनजर गर्दै तथा पर्यटन प्रबद्र्धनमा समेत सहयोग पुग्ने उद्देश्यले खाना महोत्सव गर्न लागिएको होटल एसोसिएसन भेडेटारका अध्यक्ष तुमराज लिम्बुले जानकारी दिए ।

भेडेटारमा तराईका जिल्लाहरूमा साथै छिमेकी देश भारतबाट सबैभन्दा बढी पर्यटकहरू पुग्ने गरेका छन् । फेस्टिभलमा करिब २ करोड ५० लाख बराबरको कारोबार गर्ने तथा ५० देखि ६० हजार पर्यटक भित्राउने लक्ष्य राखिएको आयोजकले जनाएको छ ।