काठमाडौं– नेपाली कांग्रेससहित ६८ सांसदको हस्ताक्षरसहित प्रतिनिधिसभा पुनर्स्थापनाका लागि सर्वोच्चमा दायर भएको पूरक रिटमा आज पेसी तोकिएको छ ।

नेपाली कांग्रेसका ६५ (पहिलेका ८ सहित) र अन्य तीन निवर्तमान सांसदले हस्ताक्षरसहित बुझाएको प्रतिनिधिसभा पुनर्स्थापना सम्बन्धी रिटमा संवैधानिक इजलासमा सुनुवाइ हुन लागेको हो ।

पूर्वमहान्यायाधिवक्त खम्मबहादुर खातीले मङ्गलबार नेपाली कांग्रेसका ५७,  जनमत पार्टीकी गोमा लाभ, अशोक राई नेतृत्वको जनता समाजवादी पार्टी (जसपा) की हसिना खातुन र स्वतन्त्र योगेन्द्र मण्डलको हस्ताक्षरसहितको वारेसमार्फत सर्वोच्चमा रिट दिएका थिए ।

रिटमा प्रतिनिधिसभा निर्वाचनका सबै गतिविधि रोक्न माग गरिएको छ । पूरक निवेदनमा भनिएको छ– ‘असंवैधानिक तवरले नियुक्त प्रधानमन्त्री सुशीला कार्की र उनी नेतृत्वको सरकारले गर्ने भनिएको प्रतिनिधिसभा निर्वाचनसमेत अवैधानिक हुने हुँदा निर्वाचनसँग सम्बन्धित सम्पूर्ण कामकारबाही प्रतिषेधको आदेश जारी गरी रोकिपाउँ ।’

यसअघि मंसिर २३ गते कांग्रेसका ८ सांसदले संसद पुनर्स्थापनाको माग गर्दै रिट दर्ता गराएका थिए । उक्त रिटमा संवैधानिक इजलासले पुस २ गते कारण देखाउ आदेश जारी गरिसकेको छ ।

यस्तै, एमालेका ७५ सांसदहरूले मंसिर १० गते नै प्रतिनिधिसभा पुनर्स्थापनाको माग गर्दै सर्वोच्चमा हस्ताक्षर बुझाएका थिए । उक्त रिटको प्रारम्भिक सुनुवाइमा राष्ट्रपति, प्रधानमन्त्रीसहितसँग लिखित जवाफ मागिएको छ । 

कग्रेस–एमाले र अन्यको गरी संसद पुनस्थापनाको माग गर्ने निवर्तमान सांसदको सङ्ख्या १४३ पुगेको छ ।