काठमाडौं- गत भदौ २४ गतेको जेन–जी प्रदर्शनमा वातावरण भड्काएको आरोप लागेको ‘टीओबी’ समूहका अधिकांश सदस्य नेपाली नागरिक भएको प्रहरीले जनाएको छ। काठमाडौं प्रहरी परिसरले सोमबार पत्रकार सम्मेलन गर्दै टीओबीबारेको अनुसन्धान सार्वजनिक गर्दै समूहका ५७ मध्ये तेन्जिन दावा लामा मात्र तिब्बती मूलका रहेको स्पष्ट पारेको हो।

चर्को आवाजमा बाइक कुदाएको र बिजुलीबजारमा पेस्तोल देखाएको आरोपमा पक्राउ परेका तेन्जिनमाथि अभद्र व्यवहार, कागजात तथा लागूऔषधसम्बन्धी मुद्दामा अनुसन्धान भइरहेको प्रहरीले बतायो। प्रहरीले उनको साथबाट ‘तिब्बतीयन ओरिजिनल ब्लड’ लेखिएको ६ वटा ज्याकेट पनि बरामद गरेको छ।

२०२४ जुन १० मा स्थापना भएको यो बाइकर्स समूहका २६ सदस्यले आन्दोलनमा १४ मोटरसाइकल प्रयोग गरेको र ती सबै सोमबार अभिभावकको रोहबरमा सोमबार बुझाइएको छ। समूहका सदस्यहरूले र्‍यापर सुरेन्द्र गुरुङबाट प्रभावित भएर ‘हाकिम’ लेखिएको टिसर्ट प्रयोग गरेको बयान दिएका छन्।

‘यसमा ५७ जना सदस्य रहेछन्, लोगोको डिजाइन तेन्जिन नै गरेका रहेछन्,’ सोमबार आयोजित पत्रकार सम्मेलनमा उनले भने, ‘यसको पूरा रुप द ओरिजिनल ब्रदर्स रहेको देखिन्छ, तर तिब्बती मूलको भएकाले तेन्जिनले आफ्नो ज्याकेटमा तिब्तियन ओरिजिनल ब्लड लेखेको बयान दिएका छन्।’