काठमाडौं- सरकारले रक्षासचिव सुमनराज अर्याललाई मुख्यसचिवमा नियुक्त गरेको छ।

एकनारायण अर्याल अवकाशमा गएपछि सोमबार बसेको मन्त्रिपरिषद्को बैठकले अर्याललाई नयाँ मुख्यसचिव बनाएको हो ।

मुख्यसचिव एकनारायण अर्याल मंगलबार राति १२ बजेदेखि अनिवार्य अवकाशमा जाँदै छन्। त्यसअघि नै नयाँ मुख्यसचिवमा अर्का अर्याललाई नियुक्त गरिएको हो ।

सरकारले वरिष्ठता, समन्वय क्षमता, संस्थागत बुझाइ र कार्यक्षमताको मूल्यांकन गरेर अर्याललाई कर्मचारीको उच्च नेतृत्व सुम्पिएको हो । मुख्यसचिवका लागि अर्यालसँगै प्रमिला देवी बज्राचार्य, मधुसूदन बुर्लाकोटी र डा. कृष्णहरि पुष्करको नाम चर्चामा थियो ।

भदौ २३ र २४ गतेको जेन-जी आन्दोलनपछि राजनीतिक प्रभाव, विचौलिया र शक्ति समूहको दबाबमा नपरी मुख्यसचिव नियुक्त हुनुपर्ने माग कर्मचारी बृत्तले राखेको थियो ।