विराटनगर- अर्थमन्त्री रामेश्वर खनालले गत भदौ २३ र २४ को जेन-जी आन्दोलनका क्रममा गोली लागेर गम्भीर घाइते भएका सान्तनु ढकाललाई भेटेका छन् ।

सुनसरीको इटहरीमा भएको प्रदर्शनका क्रममा गत भदौ २४ गते गोली लागेर घाइते भएका मोरङको बूढीगंगा–७ मोरङका सान्तनुलई खनालले विराट शिक्षण अस्पतालमा पुगेर भेटेका हुन् ।

मन्त्री खनालले बुधबार दिउँसो अस्पतालमै पुगेर ढकालको स्वास्थ्य अवस्थाबारे जानकारी लिएका हुन् । मन्त्री खनालले घाइते ढकालको स्वास्थ्य अवस्था र उपचारबारे जानकारी लिए ।

घाइते सान्तनुका बुवा महेशले छोराको उपचारमा कुनै समस्या नरहेको बताए । सामाजिक सञ्जालमा उपचारमा समस्या भएको भनेर फैलिएको हल्ला सत्य नभएको उनले बताए । अहिले अस्पतालले सम्पूर्ण उपचार निःशुल्क गरिरहेको ढकालले बताए ।

‘छोराको शल्यक्रिया, औषधि र उपचार खर्च विराट मेडिकल कलेजले निःशुल्क गरिदिएको छ,’ उनले भने ।

घाइते सान्तनुका परिवारले उनको नाममा चन्दा संकलन नगर्न भनेको छ। उनको अवस्थालाई देखाएर सहानुभूतिको व्यापार नगर्न पनि महेशले आग्रह गरे ।