काठमाडौं– राईजिङ स्टार क्रिकेट एकेडेमीले यु–१४ टि–२० ब्वाइज ओपन क्रिकेट टुर्नामेन्टको आयोजना गर्ने भएको छ । 

एकेडेमीले आइतबार काठमाडौंमा पत्रकार सम्मेलन गर्दै भाद्र २४ देखि आश्विन ८ गतेसम्म काठमाडौंमा ओपन क्रिकेट टुर्नामेन्टको आयोजना गर्ने जनाएको हो ।

प्रतियोगितामा कुल १७ टिमले लिग र नकआउट चरण खेल्ने आयोजकले जनाएको छ । टिमहरूलाई चार समूहमा विभाजन गरिने र शीर्ष स्थानमा रहने दुई वटा टिमहरू क्वाटर फाइनलमा प्रवेश गर्ने प्रतियोगिता संयोजक सुनिल अमात्यले जानकारी दिए । विजेता टिमले ३० हजार रुपैयाँ नगदका साथै ट्रफी र प्रमाणपत्र तथा उपविजेता टोलीले २० हजार रुपैयाँ प्राप्त गर्ने उनको भनाइ छ । 

प्रतियोगिता अन्तर्गत समूह चरणका खेल र सेमिफाइनल खेल सिफल ग्राउण्ड र फाइनल खेल मूलपानी क्रिकेट ग्राउण्डमा हुने एकेडेमीले जनाएको छ ।