काठमाडौं- नायक विपिन कार्की, नायिकाद्वय केकी अधिकारी र गरिमा शर्मालाई शीर्ष भूमिकामा लिएर फिल्म ‘काजी’ बन्ने भएको छ ।

दक्षिणकाली मन्दिरमा शुक्रबार शुभमुहूर्त गरी यो फिल्म निर्माणबारे औपचारिक जानकारी दिइएको हो । लक्ष्मण रिजालको निर्देशनमा बन्ने यस फिल्मको छायाङ्कन आइतबारदेखि स्याङ्जाबाट सुरु हुने बताइएको छ ।

निर्देशक रिजाल ८ वर्षपछि निर्देशनमा फर्किएका हुन् । उनले ‘धुवाँ यो नसा’, ‘अलबिदा’, ‘कायरा’लगायतका फिल्म निर्देशन गरेका छन् ।

सुपरहिट फिल्म ‘उनको स्वीटर’पछि विपीन पहिलो पटक छायाङ्कनमा निस्किएका हुन् । केकीको अभिनय रहेको फिल्म ‘जनै हराएको मान्छे’ हलमा प्रदर्शनरत छ ।

गरिमाको पछिल्लो फिल्म ‘जन्ते बाख्रो’ गत जेठ २३ मा प्रदर्शनमा आएको थियो ।

‘काजी’का यी तीन शीर्ष कलाकार बाहेक अन्यको जानकारी दिइएको छैन । निर्देशक रिजालाका अनुसार यो फिल्मको छायाङ्कनका लागि स्याङ्जामा एक गाउँको कृत्रिम सेट निर्माण गरिएको छ ।

सोसल लभस्टोरी जनरामा बन्ने यस फिल्मको लेखक प्रदीप भारद्धाज हुन् । आरएन्डआर प्रोडक्सनको ब्यानरमा बन्ने यस फिल्मको निर्माता रामप्रसाद रिजाल हुन् ।