काठमाडौं- नवीकरण गरिसकेको सदस्यतासमेत नेकपा एमालेका अध्यक्ष केपी शर्मा ओलीले रोकिदिएपछि पूर्वराष्ट्रपति विद्यादेवी भण्डारीले शुक्रबार औपचारिक धारणा सार्वजनिक गर्ने भएकी छन् ।

उनले शुक्रबार दिउँसो ३ बजे काठमाडौंको बबरमहलस्थित कार्की बान्क्वेटमा पत्रकार सम्मेलन गरेर औपचारिक धारणा सार्वजनिक गर्ने भएकी हुन् ।

साउन ५ देखि ३ दिनसम्म चलेको केन्द्रीय कमिटी बैठकले भण्डारीलाई एमालेको राजनीतिमा आउन नदिने गरी साधारण सदस्यतासमेत खारेज गरिदिने निर्णय लिएको थियो ।

यो अवस्थामा केही दिन पर्ख र हेरको रणनीतिमा रहेकी उनले शुक्रबार पत्रकार सम्मेलनमार्फत् एमालेको निर्णयबारे पनि बोल्ने भएकी छन् ।

उनले यसअघि नै आफूले एमालेको राजनीतिमा आउने निर्णय गरिसकेकाले अब नरोकिने घोषणा गरेकी थिइन् । तर ओलीले आफूसँग ११ औँ महाधिवेशनमा भिड्न आउन खोजेको ठहरसहित केन्द्रीय कमिटीबाट उनको बाटो छेकिदिएका छन् ।