काठमाडौं- पछिल्लो समय सत्तारूढ नेपाली कांग्रेसभित्र आन्तरिक विवाद र किचलो देखिएका बेला सभापति शेरबहादुर देउवाले पदाधिकारी बैठक डाकेका छन् । देउवाले सरकारमा सहभागी मन्त्रीहरूसहित शुक्रबार बिहान ९ बजे बूढानीलकण्ठमा बैठक बोलाएका हुन् ।

पदाधिकारी बैठकमा पार्टीबाट सरकारमा सहभागी मन्त्रीहरुलाई पनि बोलाइएको देउवाको सचिवालयले जनाएको छ ।

प्रधानमन्त्री केपी शर्मा ओलीको कार्यशैली र मन्त्रीहरूको कार्य सम्पादनलाई लिएर पार्टीमा असन्तुष्टि बढिरहँदा देउवाले छलफल गर्न लागेका हुन् । त्यसकै लागि उनले मन्त्रीहरूसहितको पदाधिकारी बैठक बोलाएका हुन् ।

पार्टीको तर्फबाट सरकारमा सहभागी मन्त्रीहरूले अपेक्षित नतिजा दिन नसकेको निष्कर्षसहित सातजना पूर्वपदाधिकारीहरूले मंगलबार देउवालाई भेटाएर ध्यानाकर्षण गराइसकेका छन् ।

शुक्रबारको बैठकमा अनुशासन आयोगले २०७९ को चुनावलाई लिएर व्यापक रुपमा गरेको कारबाहीबारे पनि छलफल हुने बताइएको छ ।

२०७९ को चुनावमा अन्तर्घात गरेको भन्दै निर्वाचनको ३ वर्षपछि इतर खेमाका २४ बढी नेताहरूलाई छानीछानी कारवाही गरिएपछि नेता डा. शेखर कोइरालासहित रिसाएका छन् । शेखरले यो कारवाहीलाई नमान्ने चेतावनी दिइरहेका छन् ।