काठमाडौं- नेपाली कांग्रेसका नेता डा. चन्द्रकान्त भण्डारीले नेपाली युवाहरूलाई दलालसँग मिलेर पढ्न बाहिर जाउन् भन्ने बाध्य बनाइएको बताएका छन् ।

उनले त्यसरी सेटिङमा नेपालमा स्वस्थ्य शिक्षा, आईटीलगायतका विषय पढ्न नदिइएको बताएका छन् ।

नेपाली युवाहरू बाहिर जाउन् भनेर नेपालमा कुनै पनि संस्था नखोलिएको उनले दाबी गरे । नेपालमा पढ्न नपाएर युवाहरू मोटो रकम तिरेर भारत, युरोप लगायतमा अध्ययन गर्न गइरहेको बताउँदै उनले सम्पत्ति पनि बाहिरिइरहेको उल्लेख गरे ।

‘मेरो भनाइ झुठो होस् । यहाँ तलदेखि माथिसम्म युवाहरू बाहिर जाउन्, नेपालमा नपढुन् भनेर दलालसँग मिलेर संस्था खोलिँदैन । निजी ३/४ वटा छन् । हाम्रा युवा यति राम्रा छन्, रोबट यिनैले बनाउँछन् । कम्प्युटर यिनैले बनाउँछन्’, उनले भने, ‘१२ कक्षा पढेका बच्चाहरूले आईटीमा काम गरिरहेका छन् । तर हामीले खोलिदिएनौँ । हामीले यसलाई स्वीकृति दिएनौँ ।’

यावत समस्या हुँदा पनि नेताहरूले त्यतातिर ध्यान दिएको, आधिकारिक संस्थाले अनुगमन नगरेको, नेपाली जनता शोषण र अन्यायमा परेको उनले बताए । नेताहरू काम छाडेर विदेश भ्रमणमा मस्त भएको भन्दै उनले आलोचना गरे ।

‘नेपालको सम्पत्ति बाहिर गइरहेको छ । हाम्रा नेताहरू भाषण गर्छन् । विदेश घुमेको देख्छु मैले । यहाँ यत्रो काम छ, मलाई त थाहा छैन’, उनले भने, ‘यिनीहरू मंगल ग्रहमा विकास गर्न जाँदैछन् कि ? होइन नेपालमा बस्ने हो भने त नेपाली युवाले चाहेको शिक्षा क्षेत्र हेर्नुपर्दैन ?’