काठमाडौं- राष्ट्रिय स्वतन्त्र पार्टी (रास्वपा) की प्रतिनिधिसभा सदस्य डा. तोसिमा कार्कीले प्रधानमन्त्री केपी शर्मा ओली नेतृत्वको सरकारको औचित्य सकिएको बताएकी छन् ।

प्रतिनिधिसभाको बिहीबार बसेको बैठकलाई सम्बोधन गर्दै उनले वर्तमान सरकार बन्दा गरिएका वाचा केही पनि पूरा नभएको बताएकी हुन् ।

वर्तमान सरकारले संविधान संशोधनको वाचा गरे पनि उपलब्धिका रुपमा भने मान्छे र सरकारी जग्गा बेचबिखन मात्रै भएको उनले बताइन् । उनले वर्तमान सरकारले भ्रष्टाचारमा मुछिएकालाई स्याबासीको धाप दिइरहेको बताइन् ।

‘एक वर्ष पूरा भयो सरकार बनेको, तर वाचा केही पनि पूरा भएका छैनन् । त्यसैले यो सरकारको औचित्य समाप्त भइसकेको छ । वाचा संविधान संशोधनको अनि उपलब्धि मान्छे र सरकारी जग्गा बेचविखनको । वाचा सुशासनको अनि परिणाम जनताको लागि लड्नेलाई जुडिसियल ओभर रिच र कारागार’, उनले भने, ‘अनि भ्रष्टाचारमा मुछिएकालाई स्याबासीको धाप। ठूला दलका यस्तै गतिविधिको कारण व्यवस्थामाथि प्रश्न उठिरहेको छ ।’

भिजिट भिसा प्रकरणलाई लिएर आफूहरू दुई महिनादेखि आन्दोलित हुँदा पनि सुनुवाइ नभएको उनले बताइन् ।

जसमाथि छानबिन गर्नुपर्ने हो उनीहरूकै संयोजकत्वमा समिति बनेको उनले बताइन् । उनले दुई प्रतिपक्षी दलले निरन्तर विरोध गर्दा पनि सदन चलाएकोमा आपत्ति जनाइन् । नेतृ कार्कीले ‘यो सदन जनताको हो कि सरकारको कठपुतली हो ?’ भनेर प्रश्न गरिन् ।

‘दुई प्रतिपक्षी दलले निरन्तर विरोध गरे पनि निर्वाध रुपमा यो संसद् किन चलिरहेको छ । यो संसद् कसको हो ? जनताको आवाज हो कि सरकारको कठपुतली हो ? इतिहासले यो सदनलाई सरकारको कठपुतली भनेर सुशासन निमिट्यान्न पार्न खोज्यो भनेर नलेखोस्’, उनले भनिन् ।