काठमाडौं- जनता समाजवादी पार्टी, नेपालका अध्यक्ष उपेन्द्र यादवले केपी शर्मा ओली नेतृत्वको सरकारलाई दिएको समर्थन फिर्ता लिने प्रक्रिया अघि बढेको बताएका छन् ।

उनले नेपाली कांग्रेस– नेकपा एमाले नेतृत्वको वर्तमान गठबन्धनको औचित्य समाप्त भएको भन्दै आफ्नो दलले समर्थन दिएर गल्ती गरेको भन्दै पछुतो व्यक्त गरेका छन् ।

मंगलबार भक्तपुरस्थित रफत सञ्चार क्लबमा आयोजित कार्यक्रममा बोल्दै उनले बाहिर बसेर समर्थन गरे पनि असफल भएको निष्कर्ष निकालेर पछि हट्न लागेको बताए ।

उनले पार्टीको संसदीय समितिलाई समर्थन फिर्ता लिन निर्देशन दिएको स्पष्ट पारे । ‘हाम्रो पार्टीको केन्द्रीय कार्यकारिणी समितिको बैठकले समर्थन फिर्ताको निर्णय लिएको छ, अब त्यहीअनुसार निर्णय हुन्छ’, उनले भने ।

यादवले कांग्रेस र एमालेबीचको सहकार्य नै सम्बन्धविच्छेदको अवस्थामा रहेको दाबी गरेका छन् । सरकार पूर्ण रुपमा असफल भएको पनि उनले दोहोर्‍याए । जसपा नेपालले यो सरकारलाई समर्थन गरेको थियो । तर, सरकारमा उसले सहभागिता जनाएको छैन ।