काठमाडौं– स्थानीय तहले आगामी आर्थिक वर्षको बजेट प्रत्येक वर्षको असार १० गतेभित्र ल्याउनुपर्ने व्यवस्थाअनुसार मंगलबार साँझसम्म पाँचवटा महानगरले बजेट ल्याएका छन् । काठमाडौं महानगर भने आन्तरिक समस्यामा फसेका कारण बजेट अनिश्चित बन्न पुगेको छ ।

अहिलेसम्मै भरतपुर, पोखरा, वीरगञ्ज, विराटनगर र ललितपुर महानगरपालिकाले आगामी आर्थिक वर्षको बजेट ल्याएका छन् । महानगरहरूले आफ्नो बजेटमा भिन्न–भिन्न किसिमका प्राथमिकता तय गरेको देखिएको छ ।

पोखराको बजेटका प्राथमिकता

पोखरा महानगरले आगामी आर्थिक वर्षको बजेटमा सात वटा प्राथमिकता तय गरेको छ । महानगरले हरित, उत्थानशील र दिगो पूर्वाधार विकास, पर्यटन प्रवर्द्धन र वातावरण संरक्षण, सम्वर्द्धन तथा फोहोरमैला व्यवस्थापनलाई बजेटको प्राथमिकतामा उल्लेख गरेको छ । त्यस्तै, समावेशी, सन्तुलित र समतामूलक विकास, संस्थागत विकास, सुशासन प्रवर्द्धन तथा गुणस्तरीय सेवा प्रवाह, स्वरोजगार, उद्यमशीलता तथा व्यावसायिक कृषि प्रणालीको प्रवर्द्धन र गुणस्तरीय, जवाफदेही र प्रतिस्पर्धी मानवस्रोत विकास महानगरको बजेटको प्राथमिकतामा रहेको उल्लेख छ । महानगरले आगामी आर्थिक वर्षका लागि आठ अर्ब ३५ करोड बराबरको बजेट ल्याएको छ ।

भरतपुरको बजेटका प्राथमिकता

भरतपुर महानगरले आगामी आर्थिक वर्षको बजेटमा दिगो सहरी पूर्वाधार, नियमित सडक मर्मत सम्भार र अधुरा योजनाको निरन्तरतालाई पहिलो प्राथमिकतामा राखेको छ । कृषि तथा पशु विकास कार्यक्रम, शिक्षा विकास, युवा तथा खेलकुद, स्वास्थ्य र वातावरण सरसफाइ, हरियाली एवं विपद् व्यवस्थापन महानगरको प्राथमिकतामा रहेको बजेटमा उल्लेख छ ।

त्यस्तै, भरतपुरले आगामी आर्थिक वर्षको बजेटको प्राथमिकतामा सूचना प्रविधि तथा डिजिटल प्रणालीको उपयोग, रोजगार प्रवर्द्धन र उद्यमशीलता तथा निजी क्षेत्रको सहकार्य, पर्यटन तथा उद्योग र वाणिज्य तथा सहकारीलाई राखेको छ । लैंगिक समानता, महिला सशक्तीकरण र सामाजिक समावेशीकरण र राजस्व प्रशासन तथा कर्मचारी सञ्चालन एवं व्यवस्थापन पनि सो महानगरको बजेटको प्राथमिकतामा रहेका छन् । महानगरले आगामी आर्थिक वर्षको लागि लिएका लिएका उद्देश्य तथा प्राथमिकता हासिल गर्न पाँच अर्ब १९ करोड ७१ लाख ६६ हजार रुपैयाँ बराबरको बजेट ल्याएको छ ।

वीरगञ्ज महानगरको बजेटका प्राथमिकता

वीरगञ्ज महानगरले आगामी आर्थिक वर्षको लागि वर्षको लागि ल्याएको बजेटमा जम्मा पाँचवटा विषयलाई प्राथमिकतामा राखेको छ । महानगरले शिक्षा, स्वास्थ्य, सरसफाइ व्यवस्थापन एवं वातावरण संरक्षण र पर्यटन एवं कृषिलाई आगामी आर्थिक वर्षको बजेटको प्राथमिकतामा राखेको छ ।

त्यस्तै, गुणस्तरीय भौतिक पूर्वाधार र डिजिटलमैत्री सेवा प्रवाह महानगरको बजेटको प्राथमिकतामा रहेको उल्लेख गरेको छ । वीरगञ्जले आगामी आर्थिक वर्षका लागि तीन अर्ब २२ करोड ४८ लाख ४९ हजार रुपैयाँको बजेट ल्याएको छ ।