एजेन्सी– उत्तरपूर्वी सहर सुमी नजिकै रुसी ड्रोन हमलामा पाँच वर्षीय बालकसहित तीन जनाको मृत्यु भएको स्थानीय अधिकारीहरूले मंगलबार बताएका छन् ।

युक्रेनले रुसले आफ्नो भूभागमा दर्जनौँ ड्रोन र क्षेप्यास्त्र आक्रमण गरेको र राजधानी किएभमा १० जनाको ज्यान गएको बताएको एक दिनपछि यो घटना भएको हो ।

तीन वर्षको युद्ध अन्त्य गर्ने कूटनीतिक प्रयासहरू रोकिएका छन् भने लगभग तीन हप्ताअघि किएभ र मस्कोबीचको अन्तिम प्रत्यक्ष बैठक र कुनै थप वार्ता निर्धारित गरिएको छैन ।

‘शत्रुको आक्रमणको परिणामस्वरूप पाँच वर्षीय बालक, ५२ वर्षीय पुरुष र ८४ वर्षीया महिलाको मृत्यु भएको छ’, सुमीको क्षेत्रीय अभियोजक कार्यालयले भनेको छ, ‘दुई १७ वर्षीया बालिका र एक १२ वर्षीय बालकसहित थप छ जना घाइते भएका छन्, सात आवासीय भवनहरू ध्वस्त भएका छन् भने २२ घर र छवटा सवारी साधन क्षतिग्रस्त भएका छन् ।’

सुमी क्षेत्रका सैन्य प्रशासनका प्रमुख ओलेग ग्रिगोरोभले एउटा शव ध्वस्त घरको भग्नावशेषबाट निकालिएको बताए।

‘आक्रमणले विभिन्न परिवारका मानिसहरूको ज्यान लियो । तिनीहरू सबै एउटै सडकमा बस्थे । तिनीहरू आफ्नो घरमा सुत्न गए तर रूसी ड्रोनहरूले सदाका लागि उनीहरूको निद्रामा बाधा पुर्‍यायो’, उनले भने।

रूसी ड्रोन हमलामा खार्किवमा पाँच जना घाइते भएका छन् भने दनिप्रोपेट्रोभस्क क्षेत्रमा अन्य चार जना घाइते भएको अधिकारीहरूले टेलिग्राममा बताएका छन् ।