काठमाडौं– भिजिट भिसा प्रकरणमा मुछिएका गृहमन्त्री रमेश लेखकले आफ्ना लागि राजीनामा ठूलो कुरो नभएको जवाफ दिएका छन् । संसद्मा प्रतिपक्षी नेकपा माओवादी केन्द्रका सांसद अमनलाल मोदीले गरेको प्रश्नको जवाफ दिँदै उनले राजीनामा ठूलो कुरो नभएको जवाफ दिएका हुन् । 

‘एउटा कार्यालयमा हुने छानबिन र अनुसन्धान अनावश्यक रुपले जोडेर मन्त्रीले राजीनामा दिनुपर्ने भो भने अहिलेसम्म कति मन्त्रीले दिइसक्नुपर्ने थियो र अब कति मन्त्रीले दिनुपर्ला ?,’ लेखकले भने, ‘त्यसकारण कस्तो व्यवस्था गर्ने भन्ने कुरा हो । राजीनामाको विषयमात्रै होइन र त्यो ठूलो कुरा पनि होइन । तर, के व्यवस्था बनाउने भन्ने हो ।’     

यसअघि माओवादी सांसद मोदीले भिजिट भिसा प्रकरणको छानविनका लागि समिति बनिसकेपछि राजीनामा नदिनुको कारणबारे गृहमन्त्री लेखकलाई प्रश्न गरेका थिए । 

‘पछि अनुसन्धान सकेर बेदाग भएपश्चात पार्टीले पत्याएको खण्डमा पुनः मन्त्री बनेर जीवन बिताइराखेका छन् र सादा जीवन उच्च विचार पनि भएका छन्,’ सांसद मोदीले गृहमन्त्रीलाई प्रश्न गरेका थिए, ‘तसर्थ यो किन गर्नुभएन ?’