काठमाडौं – बलिउड नायक सलमान खानले आफ्नो स्वास्थ्यबारे नयाँ खुलासा गरेका छन् ।

अतिथि बनेर ‘द ग्रेट इन्डियन कपिल शो’मा पुगेका उनले आफूलाई मस्तिष्क सम्बन्धी समस्या रहेको खुलाएका हुन् ।

उनले आफू ‘ब्रेन एनेयुरिज्म’ र ‘एभीएम’बाट ग्रसित रहेको खुलासा गरे ।

चिकीत्सकहरुका अनुसार एनेयुरिज्म हुँदा मस्तिष्कको रक्तनली असामान्य रूपमा फुल्छन् । यो अवस्थामा नसा फुट्यो भने ज्यानै पनि जान सक्छ ।

उनले आफू ‘ट्राइजेमिनल न्युराल्जिया’बाट पनि पीडित रहेको बताएका छन् । यस रोगका पीडितको अनुहारमा विद्युतीय करेन्टले जस्तै झट्का लाग्छ । जसले एकदमै पीडा दिन्छ।

सलमाने भने, ‘मेरो अनुहार दुख्दा म सुन्न र बोल्न सक्दिनँ । यस्तो पीडा सायदै कसैले सहन सक्दैन होला ।’

उनी यो रोगबाट भने सन् २०११ देखि पीडित रहेको भारतीय मिडियाहरुले उल्लेख गरेका छन् ।

उनले आफ्नो छातीको हड्डी भाँचिएको र निरन्तर स्नायु दुखाइले पीडा भइरहने पनि सुनाएका थिए ।

आफूमा यति धेरै स्वास्थ्य समस्या भए पनि दर्शकका लागि अभिनयमा सक्रिय भइरहेको उनले बताए ।

उनले भने, ‘कहिलेकाहीँ मेरो स्वास्थ्यले साथ दिँदैन तर मनले हार मान्दैन ।’