सुर्खेत– हुम्लाको नाम्खा गाउँपालिका–६ लिमीको तिल गाउँमा गएको हिमपहिरोको अध्ययन गर्न तीन सदस्यीय विज्ञ टोली काँजी हिमाल जाने भएको छ।  

गत जेठ १ गते हिमताल फुटेर पहिरो गएको आशंका गरिएको अवस्थामा त्यसको सत्यतत्थ्य पत्ता लगाउन विज्ञ टोली हुम्ला पुगेको हो । ‍ टोली आइतबार हिमपहिरो गएको स्थानतर्फ जाने नाम्खा गाउँपालिका– ६ का वडा अध्यक्ष पाल्जोर तामाङले बताए । सदरमुकाम सिमकोटबाट दुई दिन लगाएर तीन सदस्यीय टोली लिमी पुगेको हो ।

टोलीमा राष्ट्रिय विपद जोखिम तथा व्यवस्थापन प्राधिकरणका शुसिलकुमार श्रेष्ठ, खानी तथा भू-गर्भ विभागका सीडीई शिवप्रसाद बाँस्कोटा र हाईड्रोलाजिस्ट इन्जिनियर सौहार्द जोशी रहेको वडाध्यक्ष पाल्जोर तामाङले बताए । 

‘टोली तील गाउँ पुगेको छ । अब पाँच हजार तीन सय मिटर उचाइको काँजी हिमालमा पुग्नेछ,’ उनले भने, ‘दुई जना स्थानीय व्यक्ति पनि जाने छन् ।’

टोली बिहीबार सदरमुकाम सिमकोट पुगेर लिमीतर्फ लागेको थियो । टोलीले गाउँको अध्ययन गरेर आइतबार काँजी हिमाल जाने योजना बनाएको हो ।