काठमाडौं – क्रिकेट वर्ल्ड कप लिग-२ अन्तर्गत शुक्रबार राति भएको खेलमा ओमानले क्यानडालाई हराएको छ। वर्षाले प्रभावित खेलमा ओमानले क्यानडालाई डकवर्थ लुइसको आधारमा १८ रनले हराएको हो।

क्यानडाले दिएको २१३ रनको लक्ष्य पछ्याएको ओमानले वर्षाका कारण खेल रोकिँदा २३.१ ओभरमा ३ विकेट गुमाउँदै १०८ रन जोडेको थियो।

ओमानका हम्मद मिज्राले अविजित ३१ रन जोडे। मुजिबर अलि २३ रनमा अविजित रहे। कप्तान जतिन्दर सिंहले २७ रन बनाए।

यसअघि टस जितेर पहिले ब्याटिङ गरेको क्यानडाले ८ बल बाँकी रहँदा नै सम्पूर्ण विकेट गुमाउँदै २१२ रनको योगफल खडा गरेको हो। क्यानडाका लागि कप्तान नरभवित धालिवालले अभिजित ७३ तथा मनसाब घिलले ५९ रन जोडे।

ओमानका सकिब अहमद, मुजिबर अलि र मोहम्मद नदिमले समान दुईदुई विकेट लिए। तालिकामा ओमान १९ खेलमा २४ अङ्क सहित दोस्रो स्थानमा छ। नेदरल्यान्ड्स २० खेलमा २६ अङ्क सहित शीर्ष स्थानमा छ।

स्कटल्यान्ड १६ खेलमा २० अङ्क सहित चौथौँ तथा क्यानडामा १९ खेलमा २० अङ्क सहित पाँचौँ स्थानमा छन्। नामिबिया २० खेलमा १४ अङ्क सहित छैटौँ तथा युएई १६ मा ६ अङ्क सहित सातौँ स्थानमा छन्। आठौँ स्थानमा रहेको नेपालको १२ खेलमा ६ अङ्क मात्र छ।