काठमाडौं– प्रधानमन्त्री एवं नेकपा एमालेका अध्यक्ष केपी शर्मा ओलीले एमालेको राष्ट्रवादी अडान र दृष्टिकोणको कारण राष्ट्र विरोधी तत्त्वहरू एमालेविरुद्ध खनिएको बताएका छन् ।  

लोकतन्त्र दिवसको अवसरमा बिहीबार भृकुटीमण्डपमा नेकपा एमालेले आयोजना गरेको यूथ सेलिब्रेसन कार्यक्रममा बोल्दै ओलीले राष्ट्रको पक्षमा एमालेले राखेको अडानका कारण राष्ट्र विरोधी तत्त्वहरू एमाले विरुद्ध खनिएको बताएका हुन् । त्यस्ता शक्तिले एमालेविरुद्ध हरेक दिन भ्रम फिँजाउने गरेको उनको भनाइ छ । 

उनले एमाले र कांग्रेसको सरकार देशमा स्थिरता दिने गरी एउटा लक्षका साथ बनेको भन्दै सरकार तिर नभई चुनाव तिर ध्यान दिन सुझाव दिए ।

प्रधानमन्त्री ओलीले देशमा अराजकता मच्चाउने र विभाजन गर्ने तत्त्वसँग सचेत हुन पनि आग्रह गरे । लोकतन्त्रमा पनि केही गलत प्रवृत्ति देखाएका बताउँदै उनले त्यसबाट देश केही समय अलमलमा परेको बताए । अब भ्रममा नभई स्पष्ट दृष्टिकोणका साथ देश अघि बढ्नु पर्नेमा ओलीले जोड दिए।

ओलीले वैशाख ११ निरङ्कुशता पराजय र लोकतन्त्रले जितेको दिन भएकाले यस दिनलाई उत्सवको रूपमा मनाउनुपर्ने बताए ।  

निरङ्कुश व्यवस्थाको कारण देश लामो समय अन्धकारकारको युगमा गुज्रिएको उनले बताए । त्यसका विरुद्ध अनेक कठिनाइ झेलेर सङ्घर्ष गर्दै देशलाई अहिलेको अवस्थामा ल्याएको ओलीले सुनाए । अब देश युवाले बनाउनु पर्ने उनको भनाइ छ ।