काठमााडौं– आन्दोलनरत आवासीय चिकित्सकहरुले स्वास्थ्यमन्त्री प्रदीप पौडेलसँग वार्ता सुरु गरेका छन् । 

स्वास्थ्य मन्त्रालयमा जारी वार्तामा स्वास्थ्यमन्त्री पौडेल, नेपाल चिकित्सक संघका अध्यक्ष डा. अनिल कार्की, आवासीय चिकित्सकले गठन गरेको स्वास्थ्यकर्मीका लागि सुरक्षित कार्यस्थल संघर्ष समितिका संयोजक शेषराज घिमिरे, कर्णाली स्वास्थ्य विज्ञान प्रतिष्ठानका पूर्वउपकुलपति डा. मंगल रावल लगायत सहभागी छन् ।

सरकारी सरह निर्वाह भत्ताको माग गर्दै निजी मेडिकल कलेजमा कार्यरत आवासीय चिकित्सकहरू विगत २९ दिनदेखि विरोध प्रदर्शन गर्दै आएका छन् । उनीहरूले आज बिहान माइतीघर मण्डलामा पनि प्रदर्शन गरेका थिए ।

२४ घण्टाभित्र आफ्नो माग पुरा नभए शुक्रबार देशभरका अस्पतालमा आकस्मिक बाहेकका सेवा ठप्प पार्ने चेतावनी उनीहरूले दिएका छन् । 

निजी मेडिकल कलेजले निर्वाह भत्ता नदिएसम्म नियमित चिकित्सकीय सेवा पूर्णरूपमा बन्द रहने आवासीय चिकित्सक बताउँछन् । 

यता निजी मेडिकल कलेजका सञ्चालकहरूले भने सरकारी सरह निर्वाह भत्ता दिन नसकिने अडान राख्दै आएका छन् ।