काठमाडौं – लगातार चौथो जित हात पारेको मुम्बई इन्डियन्स इन्डियन प्रिमियर लिग (आईपीएल)को अङ्क तालिकामा तेस्रो स्थानमा उक्लिएको छ।

मुम्बईले बुधबार भएको खेलमा सन राइजर्स हैदरावादालाई सात विकेटले हरायो। हैदरावादले दिएको १४४ रनको लक्ष्य मुम्बईले २६ बल बाँकी रहँदा तीन विकेटको क्षतिमा १४६ रन जोड्दै पूरा गरेको हो।

मुम्बईको जितमा रोहित शर्माले ७० रन जोडे। ४६ बलको सामना गरेका उनले आठ चौका र तीन छक्का प्रहार गरे। सूर्यकुमार यादवले १९ बलमा अविजित ४० रनको योगदान गरे। उनले पाँच चौका र दुई छक्का हिर्काए।

यसअघि टस हारेर पहिले ब्याटिङ गरेको हैदरावाद आठ विकेटको क्षतिमा १४३ रनमा सीमित भएको थियो। १३ रनमा चौथो तथा ३५ रनमा पाँचौँ विकेट गुमाएको हैदरावाका लागि हेन्रिक क्लासेन र अभिनव मनोहरले छैटौँ विकेटका लागि ९९ रनको साझेदार गरेका थिए।

क्लासेनले ४४ बलमा ७१ रन जोडे भने मनोहरले धिमा गतिमा खेल्दै ३७ बलमा ४३ रन बनाए। यीबाहेक अनिकेत बर्मा १२ रन बनाए । अन्य कुनै पनि ब्याट्सम्यानले दोहोरो अङ्क छुन सकेनन्।

मुम्बईका लागि ट्रेन्ट बोल्टले चार ओभरमा २६ रन खर्चेर चार विकेट लिए। उनी प्लेयर अफ द म्याच बने। दीपक चाहरले चार ओभरमा १२ रन खर्चेर दुई विकेट लिए। मुम्बईको ९ खेलमा १० अङ्क छ।

यसैगरी हैदरावाद ९ खेलमा ४ अङ्क सहित नवौँ स्थानमा छ।यो हारसँगै हैदरावाद प्रतियोगितबाट बाहिरिने अवस्थामा पुगेको छ।