काठमाडौं– भारतीय प्रधानमन्त्री नरेन्द्र मोदीले श्रीलंकाको भ्रमण गर्ने भएका छन् । थाइल्याण्डको राजधानी बैंककमा आयोजना हुने बहुपक्षीय प्राविधिक तथा आर्थिक सहयोगका लागि बङ्गालको खाडीको पहल (बिम्सटेक) को सम्मेलनलगत्तै प्रधानमन्त्री मोदी श्रीलंका जाने तय भएको छ ।

बैंककमा बिम्सटेकको सम्मेलन यही अप्रिल महिनाको ३ र ४ तारिखमा आयोजना हुँदैछ । भारतीय डिजिटल पत्रिका द प्रिन्टका अनुसार प्रधानमन्त्री मोदीको यो चौथो श्रीलंका भ्रमण हुनेछ । यसअघि मोदीले सन् २०१५, २०१७ र सन् २०१९ मा श्रीलंकाको भ्रमण गरेका थिए ।

यसअघि एक वा दुई दिनका लागि श्रीलंका जाने मोदीको यसपटकको भ्रमण भने तीन दिवसीय हुने जनाइएको छ । श्रीलंकाली राष्ट्रपति अनुरा कुमारा दिसानायकेको निमन्त्रणामा प्रधानमन्त्री मोदी त्यसतर्फ जान लागेका हुन् ।

 भ्रमणका क्रममा राजधानी कोलम्बोमा प्रधानमन्त्री मोदीले उच्चस्तरीय भेटवार्ता गर्ने कार्यक्रम छ ।